Free counter and web stats

Lèxi e nòtete inte sta mariègoƚa:
Sta scritura ƚa xé in Vèneto teraferma oriental (-to); savemo che ƚa xé acesìbiƚe a tuti i parlanti de altre varianse.

Benvignù/a!
Notàndote a sto galepin social (in sèguito "GS"), un sistèma de archiviasion e condivixion de dati so 'l lèsico vèneto, te gà da saver che te sì òspite de na strutura privada (ƚa no-profit "el Galepin", dom. elgalepin.com/.org/.info parte de "Veneto-org" non profit) e te gà da respetar poche ma fondamentaƚe riègoƚe de condota.

Profiƚo personal
El to nòme e cognòme no i vegnarà publicài so 'l GS né destribuìi a altri, a manco che no te ƚi vòji doparar fà "nòme de autor"; el to indriso de email no'l vegnarà mai difuxo in nisuna manièra, anca se te desidi de consentir el contato email da parte de i vixitadori de 'l GS; te podarà aver un "nòme de autor" (publicà so ƚe schède de 'l GS) personal e unìvoco, co' cui te sarà identifegà inte 'l GS. Co' el to "nòme autor" e ƚa to "password" te podarà intrar inte 'l to spasio personal par inserir resorse, modifegarle, canbiar i dati de 'l to profiƚo e altro. Na vòlta asegnà, el to "Nòme Autor" no'l podarà mai ser modifegà in futuro, e el restarà ligà par senpre co' ƚe resorse tacàe (a manco che no ƚe vègna scanseƚàe). Te sì tì el gestor de i to dati personaƚi, "el Galepin" el te asegnarà un "nòme autor" na vòlta par senpre, dòpo de ché e no'l podarà mai gestir i dati de 'l to profiƚo sensa el to consenso, ma el se risèrva el derito de scanseƚar un utente e/o dato sensa preavixo e co' decixion autònoma, siando in posesion de i deriti so 'l material inserìo so i so server.

Dati pùblici

Se pol:
Archiviar e mostrar videi, someje, sonòri, tèsti, o autoprodoti o disponìbiƚi so 'l web (inte 'l dominio pùblico), faxéndose anca reclan personal anca come profesionista/axienda, o a ƚa pròpia o altrui sociasion, scòƚa, paròchia, fraja, fradèrnida, fameja, fondasion, mariègoƚa, sércoƚo, paexe, contrada, condominio... Xé consentìo anca de tacar publicità axiendal, ma nòma che drio consenso de "el Galepin", che el gavarà da vaƚutar ƚa oportunità caxo par caxo.

No se pol:
Xé proibìo de tacar materiaƚi ofensivi de ƚa Reƚigion, de ƚa moral, o inte i confronti de persone spesìfeghe cualsesipia. No se pol doparar el sistèma par citar esplicitamente o inplicitamente, o métar in reƚasion traèrso link o altri mòdi, partidi democràteghi, ministrasion gestìe da i stesi, sociasion segrète o pùbliche de ispirasion marsona o revoƚusionaria, o altre struture simiƚari. Tuto el rèsto el xé consentìo, fando texòro de ƚa bona creansa e de 'l scòpo par cui el sistèma el xé stà meso in funsion, tegnindose inamente che comuncue dipende tuto da ƚa liberaƚità de "el Galepin" che el gà el derito de gestir el material inserìo come che convien par ƚa bona prexentasion de i so siti e par ƚa so reputasion.

Ƚe resorse inserìe inte 'l GS ƚe sarà senpre disponìbiƚi par tuti i utenti, par archiviasion personal o online, par condivixion via email, so altri "social network" o sistèmi de "signaƚasion" pùblica, servìndose de i link predispòsti so ƚa pàxena de ƚa schèda corispondente de "el Galepin" online e de tuti i so mirror.

Fin de ƚa mariègoƚa.

Co te sarà indrento el to spasio personal
te catarà tuti exenpi e ƚe istrusion in formato video par doparar el GS.

Nòrme de armonexasion:
Scrivi co' ƚa to lengua local e in grafìa unidaria, da mòdo che tuti i pòse lèxar ƚa to lengua, e nò interpretarla co' ƚa sua. Ƚa comunità de 'l forum ƚa existe par dar asistensa in tute ƚe manière che se pol.
Xé bona nòrma (ma se capise che te piaxarà mèjo anca a ti) de rispetar un poca de "preformatasion" in manièra che i dati i sipia a despoxision de tuti pì guaƚivamente, e indrento el to spasio te catarà istrusion exauriente (serchemo senpre de darle in formato video, par réndarle pì ladine). Tien conto che te sì drio propóner, prexentar, consejarghe de vardar calcòsa a altri utenti. In particoƚar:

  1. Videi/sonòri: se un video o un sonòro el xé riferimento dirèto, cioè co' drento un vocàboƚo particoƚar (prexenpio na fraxe de strada, co' un exenpio de uxo de ƚa paròƚa "seƚegheta"; un tocheto de comèdia in cui i atori i dòpara ƚa paròƚa, ect.) se prèga de tacar resorse no masa ƚonghe, in manièra che i utenti no i gabia da spetar menuti o mex'ore prima de rivar a 'l duncue. Podemo pensar che 30 secondi, o manco, i sipia xà suficenti, 1 menuto el xé xà tanto, pì de un menuto xé segno de malcreansa inte i confronti de chi che se invita a vardar. Se invense ƚa resorsa multimedial ƚa xé un "contenidor de argomento" come de na ensiclopedìa (prexenpio el video documentario de 'l conportamento de na seƚegheta durante faxe de ƚa so vita) ƚa pol èsar anca de diexene de menuti, o ore... Xé bona nòrma de scrìvar, oltre che na descrision de 'l contenudo, anca ƚa durada inte 'l tìtoƚo de na resorsa audio-video.
  2. Someje/fegure: se pol tacar indretamente link a na imàxene so 'l web ospitada so'l sito tuo o de altri (sensa dixegnar na pàxena postatamente par contegnirla so 'l GS), ma serca de tegnir conto de ƚe dimension in mòdo che se ƚe veda poƚito inte ƚa fenèstra, anca da parte de chi che i gà un schèrmo ridoto, tipo tablet (500-600 piksel xé bona nòrma).
  3. Link a HTML estèrni: inte 'l cuadro de 'l GS se pol mostrar pàxine prexenti so altri server, basta che se pòse mostrarle drento 500-600 pìksel de larghesa, par el steso motivo de'l ponto (2). Se pol scroƚar ƚa fenèstra in vertical, ma no xé tanto bèƚo de farlo in tute ƚe diresion.
  4. Pàxine "in linia": se pol anca dixegnar ƚa pàxena da tacar (co' un editor online fornìo indrento a 'l GS), par cui val ƚe racomandasion de sora. Xé senpre custion de bon senso: se un autor el inserise un paradigma verbal o un artìcoƚo o na poexìa, no sarà posìbiƚe magari tegnirse drento i lìmiti de altesa, ma de larghesa sì. Inte 'l editor de 'l GS se pol gestir ƚe dimension e ƚa cuantità de i contenudi, imàxine, videi, ect.. come che se vol.

Tuto ciò el xé manco òstrego de cuel che te pensi, pì fàsiƚe da far che da dir, pì fàsiƚe che béver un gòto de acua.
Tuti chi che i gà un personal computer e na conesion internet i pol gestirse ƚe so resorse personaƚe so 'l GS, come scrìvar na email.


Òro, vero? E ƚora nòtete in mariègoƚa

Par notarte a 'l GS, contata ƚa redasion de "el Galepin" deƚongo: