Skype

Cuà semo inte 'l canpo "para"-navegadori e pòsta letrònega. Skype el xé in realtà un programa par teƚefonar via internet a tuti i teƚèfoni che se vol, e anca video-fonar a gratis "Skype-so-Skype" (cioè fra utenti che i lo gà istaƚà). Ma el gà anca funsion de chat (IM, Instant Messaging) e pòsta vocal. El file de lengua el xé in faxe grexa, ma suficente a uxo normal (chi che i pol proarlo co' tute ƚe funsion el pol farlo e signaƚar còsa che ghe xé da corèxer eventualmente so ƚe stringhe de mesajo e istrusion). Come interfacia el xé un fià un pastròcio de divèrse finèstre e divèrsi stili, in parte suportanti i caràteri Latin Extended additional e in parte nò, cusì el file destribuìo el gà el famoxo èle poƚaco anca doparà in altre ocaxion da i vèneti sentràƚi e venesiani. Oviamente val senpre el invito a far ƚe version locaƚi anca in altre varianse; co' Skype xé oncora pì fàsiƚe parché el gà un editor de lengua incorporà (!). Veronexi, trentini, triestini i gavarà anca manco problèmi daché no ghe ocor èle tajài, e feltrin belunexi e vèneto sentraƚi che i scrive co' interdentaƚi i pol ben doparar i dìgrafi a 'l posto de i grafi. Se pol descargarlo da sto link (clik drèto e "salva co' nòme"; desconpata el zip; carga el file indrento Skype da 'l menu "tools/change language/load language file").