Ghe xé na òtima imàxene de promemòria de come che funsiona i tasti in Linux.

Sto mètodo el funsiona so ƚe Distro Gnome Linux, Ubuntu, Mint e altre.
Descarga da cuà soto e tiente na còpia so ƚa scrivanìa (o indove che te piaxe mèjo):

Se pol scrìvar scuaxi tuto doparando el fastasmagòrego tasto "Alt Gr", ben nòto a i Linuksisti.

No se pol inserir pròpio tuti i grafi ùtiƚi come "Č", "Ç", "Ẑ", "Ž", "Š" majùscoƚi e minùscoƚi, ma ghe xé invense ƚa posibiƚità de scrìvar i diacrìteghi acento grave, acento acuto, e altri da conbinar co' ƚe vocaƚe, come che femo co doparemo ƚa tastièra "Euro Latin" co'l Keyman; el acento acuto cuà el se conbina anca co' "c", par cui ràngete ;)
Se te vol, te pol far anca "a ƚa vècia", come a i tenpi de i primi PC: scrìvi tuti "Ć" o "Ł" o "¢" o altri caràteri "ciave" par far prima, e 'pò "cata e sostituisi" i caràteri co' i grafi pì "pròpi" (che te piaxe mèjo ma che no te gà sotoman so ƚa tastièra) in tuto el documento, in 2 secondi. Te cati i grafi so ƚa mapa Unicode.

Mapa de tastiera co' tuti i caràteri Uncode:

Oviamente ghe xé na mapa de tuti i caràteri Unicode anca inte ste Distro Linux (Gnome Character Map).

Par inviar ƚa mapa te pol dar el comando gucharmap (anca fàsiƚe da ramentarse, Gnome Unicode Character Map). El bàgoƚo el gavarìa da èsar xà istalà, se te dòpari par exenpio Linux Mint. Da ƚa mapa te pol copiar tuti i caràteri che te ocor (purmasa no ghe xé ƚa posibiƚità de dopio clic par inserirli deƚongo inte'l documento, come da ƚa mapa de'l Keyman).

Inserimento de caràteri co'l so còdexe Unicode

El xé el mètodo anàlogo a "Alt+xxxx" in Windows.
Indentro el documento che te sì drio scrìvar:

1. Struca "CTRL+Maiusc+U" (se otien un caràtere provixòrio de sto segnato: U)
2. Dìgita sùbito darente el còdexe Unicode (anca in minùscoƚo par far prima)
3. Struca Invìo

Se otien ƚa sostitusion de'l caràtere provixòrio+Unicode co'l grafo che te intendevi.

Se te vol tegnirte inamente do-trè còdexi Unicode e doparar sto mètodo, te fà prima che nò verxendo ƚa mapa caràteri. Fà come che te piaxe mèjo. I utenti Linux i xé Nerd e no i se fà tanti problèmi a doparar ƚa tèsta.

Par scrìvar in Ruso o Grègo indretamente so ƚa stesa tastièra come co'l Keyman, purmasa in Linux no xé sénplice. Te pol proar comuncue a far funsionar el Keyman par Linux; so calche Distro el funsiona.